یەکەم ئۆڵەمپیادی ڕۆبۆتی مرۆڤیی لە چین
لە بەیجینگی چین یەکەم یارییەکانی جیهانیی ڕۆبۆتی مرۆڤیی بەڕێوەچوو کە سێ ڕۆژی خایاند. زیاتر لە ٢٨٠ تیم لە ١٦ وڵاتی جیاوازەوە بەشدارییان کرد، لەوانە ئەمریکا، ئەڵمانیا، برازیل و چین. زۆربەی تیمەکان لە زانکۆکانەوە هاتبوون، بەڵام هەندێکیان نوێنەرایەتیی کۆمپانیا بەناوبانگەکانی وەک “یونیتری” و “فۆرنیەر ئینتێلیجەنس”یان دەکرد.
ڕۆبۆتەکان لە چالاکی جۆراوجۆردا پێشبڕکێیان کرد، لە وەرزشی تەقلیدی وەک ڕاکردن و تۆپی پێ تا کارە عەمەلییەکانی وەک پاککردنەوە و جیاکردنەوەی دەرمان. کۆمپانیای “یونیتری” چوار مەدالیای زێڕینی بەدەستهێنا لە پێشبڕکێکانی ١٥٠٠ مەتر، ٤٠٠ مەتر، ١٠٠ مەتر و شانبەشانی ٤×١٠٠ مەتر. ئەو کۆمپانیەیە ڕایگەیاند کە بەرزترین خێرایی ڕۆبۆتەکەی ٤.٧٨ مەتر لە چرکەیەکدا بووە، واتە نزیکەی ١٠ میل لە کاتژمێرێکدا.
لەگەڵ ئەوەشدا لە پێشبڕکێی ١٠٠ مەتردا باشترین کات ٣٣.٧١ چرکە بوو کە زۆر دوورە لە ڕێکۆردی جیهانیی یوسەین بۆڵت کە ٩.٥٨ چرکەیە لە ساڵی ٢٠٠٩ەوە. ڕۆبۆتەکان هێشتا بە یەکدا دەکەون و کێشەیان لەگەڵ هاوسەنگی و هاوکاریدا هەیە لەکاتی ئەنجامدانی ئەرکەکان.
ئەم بۆنەیە دەرفەتێک بوو بۆ تیمەکان تا توانای دیزاینەکانیان پیشان بدەن و لە هەمان کاتدا بەرگریی ڕۆبۆتەکانیان تاقیبکەنەوە لە ژینگەیەکی پێشبڕکێدا. بەڵام هێشتا ڕێگایەکی دوور لەبەردەمدایە تا ئەم ڕۆبۆتانە بە شێوەیەکی بەرفراوان بەکاربهێنرێن، بەتایبەتی ئەگەر نەتوانن لە کۆلیشن لەگەڵ یەکدا دوور بکەونەوە.
