کارگە نوێیەکەی شاومی
کۆمپانیای چینی شاومی کارگەیەکی تەواو ئۆتۆماتیکی دەرخستووە کە لە هەر چرکەیەکدا یەک مۆبایلی زیرەک بەرهەم دەهێنێت و ٢٤ کاتژمێر لە هەفتەدا کار دەکات، بەبێ ئەوەی کرێکارانی بەرهەمهێنان تێدا بن، تەنانەت لە تاریکیشدا کار دەکات.
بەپێی لی جون، دامەزرێنەر و بەڕێوەبەری گشتی شاومی، ئامانجیان بەرهەمهێنانی نزیکەی ١٠ ملیۆن مۆبایل لە ساڵێکدایە لە ڕێگەی ئەم کارگە زیرەکانەوە کە بە تەواوی پشت بە زیرەکی دەستکرد دەبەستن.
کارگاکە لە ناوچەی چانگپینگ لە باکووری ڕۆژهەڵاتی بێجینگ دانراوە و ڕووبەرەکەی ٨٠ هەزار مەتری چوارگۆشەیە. سیستەمی ژیری دەستکردی کارگاکە دەتوانێت کێشەکان بدۆزێتەوە و چارەسەریان بکات و لە هەمان کاتدا پرۆسەی بەرهەمهێنان بەرەوپێش ببات، هەموو ئەمانەش بەبێ دەستتێوەردانی مرۆڤ.
ئەم کارگایە ژینگەیەکی زۆر پاک و بێ تۆزی دابین دەکات، بۆیە ژمارەیەکی کەم لە کارمەندان تەنها بۆ چاودێری و کۆنتڕۆڵکردن لە ژوورەکانی تایبەتدا دەمێننەوە و دەبێت جلوبەرگی پارێزەر لەبەر بکەن.
