نرخی زێڕ و ڕیکۆردێکی مێژوویی
نرخی زێڕ لە بازاڕە جیهانییەکاندا بە ڕێژەی %٣ بەرزبووەوە و ئاستی ٥٠٠٠ دۆلاری بۆ هەر ئۆنسەیەک تێپەڕاند. ئەم هەڵکشانە بەهۆی پەرەسەندنی گرژییە سیاسی و سەربازییەکانی نێوان ویلایەتە یەکگرتووەکانی ئەمریکا و ئێران دێت، بەتایبەت دوای خستنەخوارەوەی فرۆکەیەکی بێفڕۆکەوانی ئێرانی لەلایەن هێزەکانی ئەمریکاوە لە دەریای عەرەب، کە وایکرد وەبەرهێنەران زێڕ وەک پەناگەیەکی ئارام بۆ سەرمایەکانیان هەڵبژێرن.
هاوکات لەگەڵ توندبوونەوەی گرژییەکان، هۆکارە ئابوورییەکانی ناوخۆی ئەمریکاش کاریگەرییان هەبووە؛ پێشبینییەکان بۆ کەمکردنەوەی نرخی سوود لەلایەن بانکی ناوەندی ئەمریکاوە (Federal Reserve) هاندەرێکی تر بوون بۆ بەرزبوونەوەی نرخی ئەم کانزا زەردە، چونکە بە شێوەیەکی گشتی کەمبوونەوەی نرخی سوود دەبێتە هۆی بەرزبوونەوەی بەهای زێڕ.
تەنها زێڕ نەبوو کە بەرزبووەوە، بەڵکو کانزا بەهادارەکانی تریش پشکیان بەرکەوت؛ نرخی زیو بە ڕێژەی %٣.٢ بەرزبووەوە و گەیشتە ٨٧.٨٤ دۆلار، هەروەها نرخەکانی پلاتین و پەلادیۆمیش بە هەمان شێوە ڕوو لە بەرزبوونەوە چوون. ئەم دۆخە نیشانەی ناسەقامگیری بازاڕە جیهانییەکانە لەبەرامبەر هەڕەشە جیۆپۆلیتیکییەکان.
