مێتا کار لەسەر پەرەپێدانی مەدالیایەکی زیرەکی دەستکرد دەکات

بەپێی یاداشتنامەیەک کە ماڵپەڕی (The Information) بینیویەتی، کۆمپانیای مێتا سەرقاڵی پەرەپێدانی مەدالیایەکی زیرەکی دەستکردە (AI Pendant) و پلانی وایە لە ساڵی داهاتوودا دەست بە تاقیکردنەوەی بکات.

ئەم ئامێرە پێدەچێت سوود لە کارەکانی کۆمپانیای (Limitless) وەربگرێت، کە ستارتاپێکی ئامێرە زیرەکەکان بوو و مێتا لە کۆتایی ساڵی ٢٠٢٥دا کڕییەوە. ئەو ستارتاپە مەدالیایەکی زیرەکی دروستکردبوو کە بەکارهێنەران دەیانتوانی لە کراسەکانیانی بدەن یان وەک ملوانکە بەکاریبهێنن بۆ تۆمارکردنی گفتوگۆکانیان. لەو کاتەدا، مێتا ڕایگەیاند کە ئەم کڕینە ڕێگەیان پێدەدات "کارەکانمان بۆ دروستکردنی ئامێرە پۆشراوەکانی کارا بە زیرەکی دەستکرد خێراتر بکەین."

ئامێرە پۆشراوەکانی پێشووی زیرەکی دەستکرد نەیانتوانی سەرنجی کڕیاران ڕابکێشن — ڕەنگە بەهۆی نیگەرانییەکانی تایبەتمەندێتی (Privacy) و بەبازاڕکردنی نەگونجاو بێت، یان ڕەنگە تەنها ئەوە بێت کە ئەوەندە سوودبەخش نەبوون. بەڵام کۆمپانیاکانی وەک (OpenAI) هێشتا کۆڵیان نەداوە.

هەروەها باس لەوە کراوە کە ناوەڕۆکی یاداشتنامەکە ئاماژە بە پلانی کۆمپانیاکە دەکات بۆ فراوانکردنی بەرهەمەکانی لە بواری چاویلکەی زیرەک و ڕاگەیاندنی سیستمێکی بەشداریکردنی بازرگانی بەناوی "Wearables for Work". مێتا لە ڕێگەی ئەم هەموو ئامێرە نوێیانەوە هەوڵ دەدات بارودۆخی دارایی بەشی "Reality Labs" بگۆڕێت، کە بەشێکی تایبەتە بە پەرەپێدانی ڕەقەکاڵا و تەنها لە چارەکی یەکەمی ئەمساڵدا بڕی ٤ ملیار دۆلار زیانی بەرکەوتووە. مێتا بەم هەنگاوە هیوای وایە جارێکی تر ئەو بەشە بخاتەوە سەر ڕێڕەوی قازانج و سەرکەوتن.