دەنگۆکان و تایبەتمەندییەکانی Samsung Galaxy S27 Pro: مۆدێلە چاوەڕوانکراوەکە!

ماوەیەکی زۆرە بەکارهێنەرانی سامسۆنگ داوای مۆدێلێکی "بچووکتر بەڵام بەهێز لە ئاستی ئۆڵترا" دەکەن. بەپێی نوێترین زانیارییە دزەپێکراوەکان، سامسۆنگ خەریکی پەرەپێدانی ئەندامێکی نوێیە بۆ خێزانی داهاتووی خۆی بە ناوی Galaxy S27 Pro کە هێزی مۆدێلی ئۆڵترا لە جەستەیەکی گونجاوتردا کۆدەکاتەوە.

ئەمەش پوختەی گرنگترین تایبەتمەندییە دزەپێکراوەکانی ئەم مۆبایلەیە:

شاشەیەکی ڕوون و پارێزراو

• قەبارە و جۆر6.47 ئینج لە جۆری Flat OLED (تەخت) بە تەکنەلۆژیای LTPO و ڕوونی 2K و تێکڕای نوێبوونەوەی 120Hz.
• AR Coating تایبەتمەندی دژە ڕەنگدانەوەی ڕووناکی بۆ بینینێکی ڕوونتر لەبەر تیشکی خۆر.
•  Privacy Display گۆشەی بینین تەسک دەکاتەوە، بۆ ئەوەی کەسانی دەوروبەرت نەتوانن سەیری ناو مۆبایلەکەت بکەن.

ڕەقەکاڵا و پڕۆسێسەری داهاتوو

• پڕۆسێسەر: بەپێی وڵاتەکان، مۆبایلەکە بە یەکێک لە دوو بەهێزترین چیپەکانی بازاڕ دێت: Snapdragon 8 Elite یان Exynos 2700.
• تایبەتمەندییەکان:  دەرچەی خێرای USB 3.2ی هەیە بۆ گواستنەوەی خێرای فایلەکان، لەگەڵ تایبەتمەندیی دژە ئاو و تۆز.

شۆڕشی کامێرا بە تەکنەلۆژیای ALoP

سیستەمی کامێرای ئەم مۆدێلە لە بەرزترین ئاستدایە:

• کامێرای سەرەکی: ٢٠٠ مێگاپێکسڵە و سیستەمی دژە لەرزینی تێدایە، بۆ ئەوەی ئەگەر دەستت لەرزی، وێنەکانت بە لێڵی دەرنەچن.
• کامێرای دووەم (گۆشەفراوان): ٥٠ مێگاپێکسڵە، بۆ ئەوەی بتوانیت لە شوێنێکی نزیکەوە وێنەی دیمەنی زۆر پان یان کۆمەڵە خەڵکێکی زۆر بگریت.
• کامێرای زووم (تێلیفۆتۆ): ٥٠ مێگاپێکسڵە و ٣.٥ هێندە (3.5x) بەبێ تێکچوونی کوالێتی زووم دەکات. لێرەدا تەکنەلۆژیای نوێی (ALoP) بەکارهاتووە کە لێنزەکان بە پاڵکەوتوویی دادەنێت؛ ئەمەش وادەکات کامێراکە لە شەودا ڕووناکی زۆر زیاتر ڕابکێشێت و چیتر پشتی مۆبایلەکەش قۆقز و بەرز نەبێت.

پاتری و دیزاین

• پاتری : توانای پاترییەکەی 5000mAhـە. تەکنەلۆژیای نوێی سیلیکۆن-کاربۆنی تێدایە، کە وادەکات پاترییەکی ئاوا گەورە لە ناو جەستەیەکی زۆر باریکدا جێگەی ببێتەوە و بە بێوایەریش شەحن دەبێتەوە.

پێنووس: پێنووسی S-Pen ی لەگەڵ نییە، ئەمەش وایکردووە کێشی زۆر سووک بێت و بە ئاسانی بچێتە ناو گیرفانەوە

کۆتایی: گالاکسی S27 Pro دەبێتە باشترین بژاردە بۆ ئەو کەسانەی هێزی مۆدێلی ئۆڵترایان دەوێت بەڵام بە قەبارەیەکی گونجاو و دیزاینێکی تەخت. پێشبینی دەکرێت لە سەرەتای ساڵی داهاتوودا (2027) بە فەرمی ڕابگەیەنرێت.