کێبڕکێ نوێیەکەی تیلیگرام
تێلێگرام کێبڕکێیەکی نوێی بڵاوکردنەوەی ڤیدیۆی ڕاگەیاندووە بە خەڵاتی گەورەی ٥٠ هەزار دۆلار بۆ باشترین ڤیدیۆ کە گاڵتە بە واتساپ دەکات و باشتری و بەهێزتری تێلێگرام پیشان دەدات. بەپێی وتەی پاڤێڵ دۆرۆف، دامەزرێنەری تێلێگرام، ئەم کێبڕکێیە وەڵامێکە بۆ هەڵمەتەکانی واتساپ دژی تێلێگرام. ئامانجی سەرەکی بەرزکردنەوەی هۆشیاری بەکارهێنەرانی واتساپە کە زۆربەیان نازانن ئەو تایبەتمەندیانەی کە بەکاریان دەهێنن، تێلێگرام چەندین ساڵ پێشتر داهێناونی.
تێلێگرام لیستێکی تایبەتی ٣٠ تایبەتمەندی بڵاوکردۆتەوە کە پێش واتساپ داهێنراون و دواتر واتساپ لاسایی کردوونەتەوە. دۆرۆف جەختی کردۆتەوە کە ئەم لیستە تەواو نییە و چەندین تایبەتمەندی تری تێلێگرام هەن کە واتساپ هێشتا نەیتوانیوە لاسایی بکاتەوە.
دوا ڕۆژی بەشداریکردن لە کێبڕکێیەکە ٢٦ی مایۆی ٢٠٢٥ە (کاتژمێر ٢٣:٥٩ بە کاتی دوبەی). هەموو کەسێک دەتوانێت بەشداری بکات و ئەنجامەکان لە مانگی حوزەیرانی داهاتوو ڕادەگەیەنرێن. مەرجەکانی بەشداریکردن ئەمانەن: پێویستە دەق و دەنگی ڤیدیۆکە بە زمانی ئینگلیزی بێت، نابێت کاتی ڤیدیۆکە لە ١٨٠ چرکە (٣ خولەک) تێپەڕ بکات، و دەکرێت لە تەکنەلۆژیای زیرەکی دەستکرد وەک یارمەتیدەر کەڵک وەربگیرێت.
دەستەی هەڵسەنگاندن ئەو ڤیدیۆیانە هەڵدەبژێرن کە خاوەن ڕوونترین نواندن، کاریگەرترین شێوازی بینراو، باشترین توانا بۆ گۆڕان بە میم، و بەرفراوانترین بڵاوبوونەوە بن. پێویستە ڤیدیۆکان بۆ پلاتفۆرمەکانی وەک تیک تۆک، ئینستاگرام ڕیلز، یوتوب شۆرتس و پلاتفۆرمەکانی تری هاوشێوە گونجاو بن.
