ئاگرێکی گەورە لە کۆریای باشوور سەدان خزمەتگوزاری حکومی ڕاگرت
ئاگرێک لە ناوەندی زانیاری نیشتیمانی (NIRS) لە شاری دایجۆن لە کۆریای باشوور ڕوویدا، کە کاریگەری لەسەر هەموو داتاکان هەبووە و بووە هۆی ڕاگرتنی 647 سیستەمی ئەلیکترۆنی حکومی لە سەرانسەری وڵات.
ئاگرەکە لە یەک پاتری لیسیۆم ئایۆن دەستی پێکرد و گەیشتە نزیکەی 234 باتری، بەڵام هەندێک سەرچاوە باسی 400 پاتری دەکەن. ئەمەش بووە هۆی بەرزبوونەوەی پلەی گەرمی لەناو بیناکە بۆ 160 پلەی سەدی.
تەنها نزیکەی 30 سیستەم لەو کاتەوە گەڕاونەتەوە، واتە زیاتر لە 600 سیستەم هێشتا کاریان وەستاوە. سڕینەوەی ئاگرەکە نزیکەی 22 کاتژمێری خایاند، و تەنها بە نوقمکردنی پاترییەکان بە ئاو توانرا بسڕێتەوە.
ئەم ڕووداوە نیگەرانی لەسەر پشتبەستن بە یەک ناوەندی داتا بەرزکردۆتەوە، چونکە گەیاندە ڕاگرتنی نزیکەی 650 سیستەمی حکومی، لەوانە خزمەتی فریاگوزاری لەحاڵەتی لەناکاو 119. وەزیری ناوخۆ داوای لێبوردن لە هاووڵاتیان کرد بۆ ئەم کێشەیە.
