ئیلۆن ماسک: کار و پارە لە ماوەی ٢٠ ساڵدا گرنگ نابن بۆ مرۆڤ
لە کۆبوونەوەی وەبەرهێنانی ئەمریکی-سعوودی، ئیلۆن ماسک لەگەڵ جێنسن هوانگ، بەڕێوەبەری “ئینڤیدیا”، و وەزیری پەیوەندی سعوودی بەشداریان لە گفتوگۆیەکی فراوان کرد دەربارەی داهاتووی تەکنەلۆژیا و زیرەکی دەستکرد.
ماسک جەختی لەسەر ئەوە کردەوە کە ڕۆبۆتە مرۆڤ-شێوەکان “گەورەترین داهێنان” دەبن لە داهاتوودا و شێوەی بازاڕی کار دەگۆڕن. ئەو ڕوونی کردەوە کە ئەم ڕۆبۆتانە ئامرازێکی سەرەکین بۆ کۆتایی هێنان بە هەژاری لە جیهاندا لە ڕێگەی گۆڕینی چەمکی بەرهەمهێنانەوە.
ماسک باسی لەوە کرد کە جیهان بەرەو گۆڕانێکی بنەڕەتی دەڕوات لە چەمکەکانی کار و پارەدا. ئەو گوتی کە کارکردن لە ماوەی ١٠ بۆ ٢٠ ساڵدا دەبێتە “هەڵبژاردە” وەک ڕاهێنانی وەرزشی، لەبەر ئەوەی ڕۆبۆتە زیرەکەکان زۆربەی ئەرکەکان بە کارایی زیاتر جێبەجێ دەکەن. هەروەها دڵنیایی دایەوە کە دراوەکان بەشێکی زۆر لە بەهایان لەدەستدەدەن لەگەڵ گۆڕانی شێوەی ئابووری جیهانی.
ماسک ئاشکرای کرد کە ئامادەیە بۆ دەستپێکردنی پڕۆژەیەکی تەکنیکی گەورە لە سعوودیا بە هاوبەشی لەگەڵ “ئینڤیدیا” و “هیومەین”، و ئاماژەی بەوە کرد کە سعوودیا بووەتە یاریزانێکی سەرەکی لە پێشبڕکێی پەرەپێدانی ژێرخانی زیرەکی دەستکرد.
