گووگڵ، مایکرۆسۆفت و xAI مۆدێلە نوێیەکانیان دەخەنە ژێر تاقیکردنەوەی حکومەت

پەیمانگای نیشتمانی بۆ پێوەر و تەکنەلۆژیا (NIST) ڕایگەیاند کە کۆمپانیاکانی گووگڵ، مایکرۆسۆفت و xAI وەشانی بڵاونەکراوەی مۆدێلە ژیرییە دەستکردەکانیان دەدەنە حکومەت، تاوەکو پێش خستنەبازاڕیان لە ڕووی ئاسایشی سایبەر و مەترسییە نیشتمانییەکانەوە هەڵسەنگاندنیان بۆ بکرێت.

ئەم بڕیارە دوای ئەوە هات کە مۆدێلی نوێی Mythos لەلایەن کۆمپانیای ئەنترۆپیکەوە، نیگەرانییەکی زۆری لای حکومەت و بانکەکان دروست کرد، ئەنترۆپیک دەڵێت ئەم مۆدێلە تواناکانی زۆر لەسەرووی مۆدێلەکانی دیکەوەیە؛ هەر ئەمەش وای کردووە بە گشتی بڵاو نەکرێتەوە و تەنها بۆ گروپێکی تایبەت و پەسەندکراو بەردەست بێت.

خاڵە سەرەکییەکانی ئەم ڕێککەوتنە:

پێداچوونەوەی پێشوەختە: "سەنتەری داهێنانی ژیریی دەستکرد" دەتوانێت پێش بڵاوکردنەوە، مۆدێلەکان تاقی بکاتەوە بۆ پاراستنی سەلامەتی گشتی.

کەمیی توانای تەکنیکی: بەو پێیەی حکومەت وەک کۆمپانیا زەبەلاحەکان سەرچاوەی دارایی و مرۆیی و هێزی کۆمپیوتەریی نییە، ئەم هاوبەشییە دەرفەتی بۆ دەڕەخسێنێت تاقیکردنەوەی ورد بۆ مۆدێلەکان ئەنجام بدات.

گۆڕانکاری لە سیاسەت: کۆشکی سپی دەیەوێت لە ڕێگەی گروپێکی پسپۆڕەوە چاودێرییەکی توندتر بەسەر مۆدێلەکاندا بسەپێنێت، ئەمەش پێچەوانەی ئەو سیاسەتە نەرمەیە کە ئیدارەی تڕەمپ بەرامبەر ڕێکخستنی یاسایی ژیریی دەستکرد گرتبوویە بەر.

کۆمپانیای OpenAIـیش لای خۆیەوە ئاماژەی بەوە کردووە کە پێشکەوتووترین مۆدێلەکانی دەخاتە بەردەست حکومەت، بە ئامانجی بەرگرتن لەو هەڕەشانەی لە ڕێگەی ژیریی دەستکردەوە دەکرێن.