بێئومێدییەک لە پاتری ئایفۆن ١٨ پڕۆ؛ ئەپڵ تەنها گۆڕانکارییەکی بچووک دەکات!

ڕاپۆرتە نوێیەکان بێئومێدییەکی گەورە لە پاتری داهاتووی ئایفۆن ١٨ پڕۆدا پیشان دەدەن. ئەپڵ نەیتوانیوە بازدانی گەورە تۆمار بکات و گۆڕانکارییەکەی ئەمجارەی پاتری تەنها ژمارەیەکی سەرپێیی و زۆر بچووکە.

پێشتر لە شوباتی ٢٠٢٦دا، دەنگۆیەک بڵاوبووەوە کە دەیگوت پاتری ئایفۆن ١٨ پڕۆ ماکس تەمەنی درێژتر دەبێت لە مۆدێلەکەی پێش خۆی، بەڵام تەنها بە بڕێکی کەم. ئێستاش بەپێی زانیارییەکانی سەرچاوەیەکی دزەپێکردن (کە پێشینەیەکی تێکەڵاوی هەیە لە ڕاستی و ناڕاستی هەواڵەکانیدا)، هەمان شت بۆ ئایفۆن ١٨ پڕۆ-ش ڕاستە.

بە تایبەتی، سەرچاوەی دزەپێکردنی زانیارییەکان بە ناوی (Fixed Focus Digital) ڕاپۆرتی کردووە کە بۆ وڵاتی ئەمریکا، ئایفۆن ١٨ پڕۆ پاترییەکی بە توانای ٤,٢٨٨ میلی ئەمپێر/کاتژمێر (mAh) دەبێت. بەڵام بۆ وڵاتی چین، کە هێشتا مۆبایلەکانیان پێویستی بە شوێنی سیمی فیزیکی (Physical SIM) هەیە، توانای پاترییەکە ٤,٠٥٦ میلی ئەمپێر دەبێت.

ئەم ژمارانە بەراورد دەکرێن بە ئایفۆن ١٧ پڕۆ، کە لە وەشانە ئەمریکییەکەیدا پاترییەکەی ٤,٢٥٢ میلی ئەمپێر بوو. ئەو کاتە ئەو توانایە نزیکەی ١٩٪ بەرزتر بوو لە ئایفۆن ١٦ پڕۆ-ی پێش خۆی.

بەڵام بۆ ئەمساڵ، ئەگەر ئەم ئامارە نوێیانە ڕاست بن، پاتری ئایفۆن ١٨ پڕۆ-ی ئەمریکی تەنها ٠.٨٥٪ لە مۆدێلەکەی پێش خۆی زیاترە. مۆدێلی وڵاتی چین کە سیمی فیزیکی تێدەچێت کەمێک باشترە، چونکە پاترییەکەی ١.٧١٪ باشتر بووە بە بەراورد بە مۆدێلی پێشوو کە ٣,٩٨٨ میلی ئەمپێر بوو.

کۆمپانیای ئەپڵ هیچ کاتێک ژمارەی ڕێکی میلی ئەمپێری (mAh) پاترییەکانی ڕانەگەیاندووە، بەڵکو پێی باشترە کاتژمێرەکانی بەکارهێنان وەک نموونە بهێنێتەوە. بۆ نموونە، ئەپڵ ئەو بازدانە گەورەیەی ١٩٪ی نێوان ئایفۆن ١٦ پڕۆ و ئایفۆن ١٧ پڕۆ-ی بەوە ڕوون کردەوە کە مۆبایلە نوێیەکە شەش کاتژمێر زیاتر ڤیدیۆ لێدەدات، یان هەشت کاتژمێر زیاتر لە کاتی سەیرکردنی ڤیدیۆی ئۆنلاین (Streaming) بەرگە دەگرێت.

سەرباری ئەم زیادبوونە زۆر کەمەی کە بۆ پاتری ئایفۆن ١٨ پڕۆ باس دەکرێت، ناتوانرێت بوترێت کە کاتژمێرەکانی بەکارهێنانی مۆبایلەکە وەک خۆی دەمێنێتەوە؛ چونکە ئایفۆن ١٨ پڕۆ پڕۆسێسەری نوێی (A20)ی تێدایە، کە ڕاپۆرتەکان دەڵێن زۆر زیاتر لە پێشوو وزە پاشەکەوت دەکات.

پڕۆسێسەری A20 دەبێتە یەکەم پڕۆسێسەری ئەپڵ کە بە تەکنەلۆژیای ٢ نانۆمەتر (2nm) دروست بکرێت. بە بەراورد بە پڕۆسێسەرەکانی پێشووی ٣ نانۆمەتری، باس لەوە کراوە کە A20 تەمەنی پاتری باشتر دەکات و لەوانەشە لە نێوان ١٠٪ بۆ ١٥٪ هێز و خێرایی مۆبایلەکەش زیاد بکات.

بەڵام، بڕوا وایە کە تێچووی پڕۆسێسەری ٢ نانۆمەتری A20 بۆ ئەپڵ، دوو ئەوەندەی تێچووی پڕۆسێسەری A19 بێت. ئەم دزەپێکردنە نوێیە پێشبینی ئەوە دەکات کە ئەم گۆڕانکارییە دەبێتە هۆکارێکی تری سەرەکی کە ئەپڵ ناچار بکات نرخەکانی بەرز بکاتەوە.