سەرکەوتنێک بۆ بەکارهێنەران؛ مایکرۆسۆفت ناچار دەکرێت ڕێگە بدات بە سڕینەوەی یەکجارەکی بزوێنەری گەڕانی "بینگ" لە ویندۆز 11
کۆمپانیای مایکرۆسۆفت ڕێگەی بە بەکارهێنەرانی سیستەمی ویندۆز 11 دا کە بە تەواوی ڕزگاریان بێت لە بزوێنەری گەڕانی "بینگ" (Bing) کە پێشتر لە ناو سیستەمەکەدا چەسپێنرابوو، ئەمەش وەک وەڵامدانەوەیەک بۆ فشار و یاسا توندەکانی یەکێتیی ئەوروپا.
بەپێی ڕاپۆرتێکی پێگەی تەکنەلۆجیی "دیجیتاڵ ترێندز"، ئەم گۆڕانکارییە گەورەیە دوای ئەوە دێت کە مایکرۆسۆفت ناچارکرا کڕنۆش بۆ "یاسای بازاڕە دیجیتاڵییەکان" (DMA)ی یەکێتیی ئەوروپا ببات. بەپێی ئەم یاسایە، کۆمپانیا زەبەلاحەکانی تەکنەلۆجیا بۆیان نییە خزمەتگوزارییەکانی خۆیان بەسەر بەکارهێنەراندا بسەپێنن و پێویستە بژاردەی ئازاد بۆ گۆڕینی بەرنامە بنەڕەتییەکان دابین بکەن.
تا کاتی ڕاگەیاندنی ئەم بڕیارە، کاتێک بەکارهێنەران لە ڕێگەی "سندوقی گەڕان" (Search Box) لە ویندۆز 11دا بەدوای بابەتێکدا دەگەڕان، سیستەمەکە بە زۆر ئەنجامەکانی لە ڕێگەی بزوێنەری "بینگ" و وێبگەڕی "ئێدج" (Edge) نیشان دەدا، بێ ئەوەی بەکارهێنەر بتوانێت بزوێنەری گۆگڵ یان هەر بژاردەیەکی تر جێگیر بکات. بەڵام لە نوێکاریی کۆتاییدا، بەکارهێنەران دەتوانن لە ڕێگەی ڕێکخستنەکانەوە (Settings) خزمەتگوزاریی بینگ بە تەواوی بکوژێننەوە یان بزوێنەرێکی تری وەک "گۆگڵ" یان "دەک دەک گۆ" (DuckDuckGo) بخەنە شوێنی.
شارەزایانی تەکنەلۆجیا ئاماژە بەوە دەکەن کە هەرچەندە ئەم یاسایە لە ئێستادا تەنها بۆ وڵاتانی ناوچەی ئابووری ئەوروپا (EEA) جێبەجێ دەکرێت، بەڵام بەکارهێنەرانی وڵاتانی دەرەوەی ئەوروپاش دەتوانن لە ڕێگەی گۆڕینی ناوچەی سیستەمەکەیان (Region) بۆ وڵاتێکی ئەوروپی وەک ئەڵمانیا یان فەڕەنسا، سود لەم تایبەتمەندییە وەربگرن و بۆ هەمیشە لە ڕیکلام و گەڕانە بێزارکەرەکانی بینگ ڕزگاریان بێت.
ئەم هەنگاوەی مایکرۆسۆفت وەک سەرکەوتنێکی گەورە بۆ مافی بەکارهێنەران لە دەستنیشانکردنی ئامرازە دیجیتاڵییەکانیاندا سەیر دەکرێت، و پێشبینی دەکرێت لە داهاتوودا کۆمپانیاکە ناچار بێت ئەم ئازادییە بۆ تەواوی بەکارهێنەرانی جیهان بەبێ جیاوازی دابین بکات.
