گووگڵ ڕێکاری نوێی سەلماندنی ناسنامە بۆ گەشەپێدەرانی ئەپەکان دەسەپێنێت
کۆمپانیای گووگڵ بەمەبەستی بەرزکردنەوەی ئاستی ئەمنی و ڕووبەڕووبوونەوەی ئەپە زیانبەخشەکان لە کۆگای "گووگڵ پلەی"، ڕێکارێکی نوێی بۆ پشتڕاستکردنەوەی ناسنامەی گەشەپێدەران ڕاگەیاند.
ئەم هەنگاوەی گووگڵ لە چوارچێوەی پلانێکی فراواندایە بۆ ئەوەی تا ساڵی ٢٠٢٧، سەرجەم ئەپەکانی سەر پلاتفۆرمی ئەندرۆید بە تەواوی بەم ڕێکارە نوێیەدا تێپەڕن. ئامانجی سەرەکی ئەم بڕیارە دروستکردنی ژینگەیەکی پارێزراوترە بۆ بەکارهێنەران و کەمکردنەوەی بڵاوبوونەوەی بەرنامە ساختە و زیانبەخشەکان.
دەستپێکردنی قۆناغی یەکەم
گووگڵ پلانی داناوە کە ئەم سیستمە نوێیە لە مانگی ئەیلوولی ٢٠٢٦ـەوە وەک قۆناغی تاقیکاری لە چەند وڵاتێکی دیاریکراودا جێبەجێ بکات، کە بریتین لە بەڕازیل، ئیندۆنیزیا، سینگاپوور و تایلاند.
کاریگەری لەسەر فایلەکانی APK
بەپێی پێشبینییەکان، جێبەجێکردنی ئەم ڕێکارانە ڕەنگە ببێتە هۆی ئەوەی پرۆسەی داگرتن و دامەزراندنی فایلەکانی APK لە دەرەوەی کۆگای گووگڵ پلەی، یان ئەو ئەپانەی کە ناسنامەی گەشەپێدەرەکانیان پشتڕاست نەکراوەتەوە، ڕووبەڕووی سنووردارکردن یان ئاستەنگی زیاتر ببنەوە.
بە گوتەی گووگڵ، ئەم بڕیارە یارمەتیدەر دەبێت بۆ ئەوەی بەکارهێنەران دڵنیا ببنەوە کە ئەو ئەپانەی دایاندەبەزێنن، لەلایەن خاوەن و گەشەپێدەری ناسراو و متمانەپێکراوەوە پەرەیان پێدراوە.
