یوتیوب دەوەستێت لە کارکردن لەسەر ئەم مۆبایلانە
یوتیوب کارکردنی وەستاندووە لەسەر هەندێک مۆبایلی کۆن، بەتایبەتی هەندێک ئایفۆن و ئایپادەکان کە ناتوانن نوێکاری بکەن بۆ دوای iOS 15.
وەشانی نوێی یوتیوب (وەشانی 20.22.1) پێویستی بە سیستەمی iOS 16 یان نوێتر هەیە، ئەمەش وای کردووە کە لەگەڵ هەندێک مۆدێلی کۆن گونجاو نەبێت.
یوتیوب کارکردنی وەستاندووە لەسەر ئەم ئامێرانە:
iPhone 6s و iPhone 6s Plus
iPhone 7 و iPhone 7 Plus
iPhone SE (نەوەی یەکەم)
iPod touch (نەوەی حەوتەم)
iPad Air 2
iPad mini 4
ئەم ئامێرانە ناتوانن iOS 16 کاربکەن، بۆیە ئیتر ناتوانن یوتیوب بەکاربهێنن.
بەدیلەکانی بەردەست بۆ بەکارهێنانی یوتیوب:
ئەگەر یەکێک لەم ئامێرانە بەکاردەهێنیت، هێشتا دەتوانیت یوتیوب لە ڕێگەی وێبگەڕی ئینتەرنێتەوە لەسەر مۆبایل یان تابلێتەکەت بەکاربهێنیت لە ڕێگەی بەستەری: m.youtube.com.
هەرچەندە ئەم ڕێگایە ڕێگەت پێدەدات ڤیدیۆکان ببینیت، بەڵام هەموو تایبەتمەندییەکانی ئەپڵیکەیشنەکە دابین ناکات وەک بینینی بێ پەیوەندی ئینتەرنێت یان ڕووکاری بەکارهێنانی خۆش یان پاکێجە تایبەتەکانی یوتیوب.
ئەم گۆڕانکارییە لە چوارچێوەی ئاراستەیەکی فراوانترە لە لایەن گەشەپێدەرانی ئەپڵیکەیشنەکانەوە بۆ وەستاندنی پشتگیری ئامێرە کۆنەکان و گرنگیدان بە ئامێرە نوێکان کە دەسەڵاتی تەکنیکی بەرزتریان هەیە.
لێرەدا واتساپ لە سەرەتای حوزەیراندا ڕاگەیاندووە کە ئەپڵیکەیشنەکەی کارکردنی وەستاندووە لەسەر مۆبایلە ئایفۆنەکان کە سیستەمی iOS 15.1 یان نوێتریان نییە، هەروەها ئامێرە ئەندرۆیدییەکان کە سیستەمی Android 5.0 یان نوێتریان نییە.
ئەم مۆبایلانە بریتین لە iPhone 5s و iPhone 6 و iPhone 6 Plus، سەرەڕای مۆبایلە ئەندرۆیدییە کلاسیکەکان وەک Galaxy S III لە سامسۆنگ، و HTC One X، و Sony Xperia Z کە ئیتر ناتوانن ئەپڵیکەیشنی پەیامنێری بەناوبانگی کۆمپانیای میتا بەکاربهێنن.
میتا لەسەر ماڵپەڕی واتساپ مۆبایلە کۆنەکان و سیستەمە کارکردنەکانی پێشاندا کە واتساپ ئیتر لەسەریان کارناکات.
میتا لە لاپەڕەی پرسیارە باوەکانی تایبەت بەو ئەپڵیکەیشنە ڕوونی کردەوە کە بڕیاری وەستاندنی پشتگیری لەبەر نەبوونی نوێترین نوێکارییە ئەمنییەکان یان ئەو کارکردنانە کە پێویستن بۆ کارکردنی واتساپ لەم ئامێرە کۆنانە.
کۆمپانیاکە گوتی: “لەبەر گۆڕانی بەردەوام لە ئامێر و نەرمەکاڵاکان، ئێمە بە شێوەیەکی بەردەوام پێداچوونەوە بە سیستەمە کارکردنەکان دەکەین کە پشتگیرییان دەکەین و نوێکاری دەکەین. هەموو ساڵێک، پێداچوونەوە بە ئامێر و نەرمەکاڵا کۆن و کەمتر بەکارهاتووەکان دەکەین”.
ئاشکرا بوو کە ئەم کۆتاییە بۆ مۆبایلە ئایفۆنە کۆنەکان دێت، چونکە ئەپڵ لە زیاتر لە ساڵێک پێش ئێستا ڕاگەیاندبوو کە iPhone 6 بووە بە “بەسەرچووی ماوە”، واتا ئیتر هیچ چاکسازییەکی بۆ دابین ناکات، و ناوەندە چاکسازییە مۆڵەتدارەکان ناتوانن پارچە یەدەگەکانی بۆ داوا بکەن.
