فۆکس ڤاگن” ڕووبەڕووی زیانێکی یاسایی نوێ دەبێتەوە لە شەڕی قەرەبووی دیزڵ
کۆمپانیای ئەڵمانی فۆکس ڤاگنی بەرهەمهێنەری ئۆتۆمبێل، شکستێکی دیکەی بەسەردا هات لە شەڕە یاسایییەکەی دژ بە داواکارییەکانی خاوەنانی ملیۆنان ئۆتۆمبێلی دیزڵ بۆ وەرگرتنی قەرەبوو، پاش ئەوەی ئاشکرا کرا کە ئامێرەکانی نایاسایی دامەزراندووە بۆ کەمکردنەوەی ڕێژەی دەردان لە کاتی تاقیکردنەوەکاندا بەراورد بە دەردانە ڕاستەقینەکان لە کاتی لێخوڕیندا لەسەر ڕێگاکان. دادگای دادپەروەری ئەوروپی بڕیارێکی پشتگیری کرد کە لە بەرژەوەندی دوو داواکاری دژ بە فۆکس ڤاگن دەرکرابوو.
خاوەنانی دوو ئۆتۆمبێلەکە داوای قەرەبوو دەکەن پاش ئەوەی ئامێری فێڵبازی لە دەردان تێدا دانرابوو، کە ڕۆڵێکی گرنگی لە ئابڕووچوونی فۆڵکس ڤاگندا گێڕا کە بۆ ساڵان دادگاکانی سەرقاڵ کرد، و ملیارەها دۆلاری وەک قەرەبوو تێچووی کۆمپانیاکەی کرد. ئەم ئامێرانە ئامانج لە کەمکردنەوەی گەڕانەوەی گازی دەردان بوو لە پلەی گەرمی دەرەوەی ١٠ پلەی سەدی، کە ئەمەش بووە هۆی زیادبوونی دەردانی ئۆکساید نایترۆجین، و هەندێک جار بووە هۆی پێشێلکردنی پێوەرە ژینگەییەکان.
فۆکس ڤاگن ناڕەزایەتی دەربڕی و گوتی کە ئەم ئامێرەی دامەزراندووە لەسەر ئەو گریمانەی کە ڕێگەپێدراوە، و دەسەڵاتە نیشتیمانییەکان دەیانپەسەند ئەگەر داوایان لێکرابایە. لەگەڵ ئەوەشدا، دادگای باڵای یەکێتی ئەوروپی بڕیاری دا کە ناکرێت کۆمپانیاکە لە بەرپرسیارێتی دامەزراندنی ئامێرێکی نایاسایی ئازاد بکرێت تەنها لەبەر ئەوەی دەسەڵاتە نیشتیمانییە پەیوەندیدارەکە ڕێگەپێدانی جۆری ئۆتۆمبێل یان خودی ئامێرەکەی داوە.
دادگاکە ڕوونی کردەوە کە بەرپرسیاریەتی کۆمپانیاکە جێبەجێ دەبێت جا ئامێرەکە لە کاتی بەرهەمهێنانی ئۆتۆمبێلەکەدا دابەزێنرابێت یان لە بەرواری دواتردا. لە لایەکی دیکەوە، دادگای دادپەروەری ئەوروپی جەختی لەسەر ئەوە کردەوە کە قەرەبووە دارایییەکە دەبێت گونجاو بێت لەگەڵ ئاستی زیانەکە.
بەهۆی زۆری کڕیارە زیانلێکەوتووەکانەوە، دادگای دادپەروەری فیدراڵی ئەڵمانی پێشتر ڕێنماییەکانی بۆ دادگا نزمتر ئاستەکان دەرکردبوو بۆ دیاریکردنی ڕێژەی قەرەبووی بنەڕەتی لە نێوان ٥% بۆ ١٥%ی نرخی کڕینی ئۆتۆمبێلەکە، بۆ ئەوەی پێویستی بە بەکارهێنانی پسپۆڕ یان چوونە ناو وردەکارییە تەکنیکییەکانەوە لە هەر کەیسێکدا نەبێت.
