ئایا نرخی نەوت دەگاتە ٢٠٠ دۆلار؟
بازاڕەکانی وزە چاوەڕوانی کۆتاییهاتنی ئەو مۆڵەتە دەکەن کە دۆناڵد ترامپ بە ئێرانی داوە بۆ کردنەوەی گەرووی هورمز. شارەزایان هۆشداری دەدەن کە ئەگەر هورمز بە داخراوی بمێنێتەوە، ئەگەری هەیە نرخی بەرمیلێک نەوت بگاتە ٢٠٠ دۆلار. ئەمەش دوای ئەوە دێت کە لە دەسپێکی جەنگی ئێران لە ٢٨ی شوباتەوە، نرخەکان زیاتر لە ٥٠٪ بەرزبوونەتەوە و ئێستا خاوی برێنت لە دەوروبەری ١١٠ دۆلاردایە.
گەرووی هورمز ڕێڕەوێکی ستراتیژییە و ٢٠٪ی نەوتی جیهانی پێدا تێپەڕ دەبێت. ئێران تا ئێستا داواکارییەکانی ئەمریکای بۆ کردنەوەی گەرووەکە ڕەتکردووەتەوە، ترامپیش هەڕەشەی توند دەکات ئەگەر تاران پابەندی مۆڵەتەکە نەبێت. شیکەرەوەکان لە گرووپی "ماکواری" و کۆمپانیای "FGE" دەڵێن بەردەوامی ئەم دۆخە نەک هەر نرخەکان دەگەیەنێتە ئاستێکی مێژویی، بەڵکو ئابووری جیهان تووشی "داکشانێکی هەڵئاوساو" دەکات و دەبێتە هۆی کەمبوونەوەی ٤٠٠ ملیۆن بەرمیل نەوت لە مانگێکدا.
