سامسۆنگ بە فەرمی مۆبایلی Galaxy A27 5G-ی ڕاگەیاند؛ تێکەڵەیەک لە دیزاینی نوێ و ئەدای خێرا

حوزەیری 27, 2026 - 16:25

کۆمپانیای سامسۆنگ بە فەرمی پەردەی لەسەر نوێترین مۆبایلی ئاست مامناوەندی خۆی لادا کە بریتییە لە مۆبایلی .Galaxy A27 5G ئەم مۆبایلە نوێیە، تەنیا خاوەن دیزاینێکی هاوچەرخ و سەرنجڕاکێش نییە، بەڵکوو کۆمەڵێک تەکنەلۆژیای پێشکەوتووی ژیریی دەستکردیش (AI) دەخاتە خزمەت بەکارهێنەرانییەوە.

گالاکسییە نوێیەکە بە نرخێکی کەم و گونجاو دێتە بازاڕەوە! ئەم ئامێرە لە ٣ی تەممووزی ٢٠٢٦وە لە ئەوروپا بەردەست دەبێت و نرخی جۆری ١٢٨ گێگابایتی تەنیا لە دەوروبەری ٣٥٠ یۆرۆوە دەست پێدەکات.

تایبەتمەندییە سەرەکییەکان:

سامسۆنگ لەم مۆبایلەدا گرنگی بە نوێکردنەوەی پڕۆسێسەر و دیزاینی ڕوونما داوە:

ڕوونما: 6.7 ئینچ لە جۆری Super AMOLED بە ڕوونی FHD+ و نوێبوونەوەی 120Hz، لەگەڵ دیزاینی نوێی "Infinity-O" (کونی کامێرا لە ناو ڕوونماکەدا).

ئەدا: پڕۆسێسەری بەهێزی Qualcomm Snapdragon 6 Gen 3 (بە تەکنەلۆژیای 4 نانۆمەتر).

بیرگە و یادگە: بەردەستە بە ڕامی 8 گێگابایت و بیرگەی ناوەکی تا 256 گێگابایت، لەگەڵ پشتگیری کردن لە کارتی بیرگەی دەرەکی (microSD) تا قەبارەی 2 تێرابایت.

کامێرا:

سەرەکی: 50 مێگاپێکسڵ بە تەکنەلۆژیای جێگیرکەری وێنەی OIS.

لێنزی فراوان (Ultra-wide) : 5 مێگاپێکسڵ.

لێنزی ماکرۆ: 2 مێگاپێکسڵ.

کامێرای سێڵفی: 12 مێگاپێکسڵ.

پاتری: 5,000 میللی ئەمپێر، بە پشتگیری بارگاویکەرەوەی خێرای 25 وات.

پشتگیری نەرمەکاڵایی ناوازە

یەکێک لە دیارترین خاڵە بەهێزەکانی ئەم مۆبایلە، ستراتیژی سامسۆنگە بۆ درێژکردنەوەی تەمەنی بەکارهێنانی ئامێرەکە. مۆبایلیGalaxy A27 5G ڕاستەوخۆ لەگەڵ سیستەمی Android 16 و ڕووکاری نوێیOne UI 8.5 دێت؛ هاوکات کۆمپانیاکە بەڵێنی ناوازەی داوە بە دابینکردنی ٦ ساڵ نوێکردنەوەی سیستەمی ئەندرۆید و ٦ ساڵیش ئەپدێتی ئەمنی بۆ مۆبایلەکە.