ئامازۆن وەرگرتنی کڕیاری نوێ لە "میکانیکاڵ تێرک" (Mechanical Turk) ڕادەگرێت
ڕەنگە ئەمانە کۆتا ڕۆژەکانی خزمەتگوزاریی "میکانیکاڵ تێرک"ـی کۆمپانیای ئامازۆن بن. ماڵپەڕی میکانیکاڵ تێرک لە ڕێگەی ئاگادارییەکەوە ڕایگەیاندووە کە لە ٣٠ی تەممووزی ٢٠٢٦دا، وەرگرتنی کڕیاری نوێ لەم خزمەتگوزارییەی کۆکردنەوەی سەرچاوەی جەماوەرییەدا ڕادەگیرێت.
بەشی خزمەتگوزارییەکانی وێبی ئامازۆن (AWS) ڕایگەیاندووە کە ئەم بڕیارە دوای "لێکۆڵینەوەیەکی ورد" دراوە، و دەڵێت: "کڕیارانی ئێستا دەتوانن بە شێوەیەکی ئاسایی بەردەوام بن لە بەکارهێنانی خزمەتگوزارییەکە. AWS بەردەوامە لە وەبەرهێنان لە چاکسازییەکانی بواری ئاسایش و بەردەستبوونی میکانیکاڵ تێرک، بەڵام چاوەڕوان ناکەین هیچ تایبەتمەندییەکی نوێ زیاد بکەین."
ئامازۆن هێشتا بە تەواوی کۆتایی بەم پلاتفۆرمە نەهێناوە، بەڵام خزمەتگوزارییەکە لە دۆخێکی زۆر سستدایە و بەرەو نەمان دەچێت.
خزمەتگوزاریی میکانیکاڵ تێرک کە بۆ یەکەمجار لە ساڵی ٢٠٠٥دا دەستیپێکرد، بازاڕێک بوو کە تێیدا بڕە پارەیەکی زۆر کەم بە خەڵک دەدرا لەبەرامبەر ئەنجامدانی چەند کارێکی سادەدا کە نەدەەکرا بە تەواوی ئۆتۆماتیکی بکرێن؛ وەک چارەسەرکردنی کۆدەکانی CAPTCHA یان دەستنیشانکردنی هەستی بنەڕەتی ناو ڕستەیەک.
لە سەردەمی زێڕینی خۆیدا، ئەم خزمەتگوزارییە لە چەقی گفتوگۆکانی تایبەت بە ئەخلاقیاتی کارکردنی جەماوەریدا بوو، تەنانەت ڕۆڵێکی بچووکیشی هەبوو لە قۆناغە سەرەتاییەکانی ئابڕووچوونەکەی فەیسبووک و کامبڕیج ئەنەلیتیکا (Facebook-Cambridge Analytica).
کۆمپانیای ئامازۆن لە ساڵی ٢٠١٨ بەدواوە، ئەم خزمەتگوزارییەی وەک ئامرازێک بە کۆمپانیاکان ناساند بۆ نیشانەکردنی داتاکان بە مەبەستی ڕاهێنانی تۆڕە دەمارییەکان، کە وەک بەشێک لە پلاتفۆرمی ژیریی دەستکردی SageMaker کاری دەکرد.
بە شێوەیەکی ناڕاستەوخۆش، میکانیکاڵ تێرک وەک پاڵپشتێکی شاراوە وەسف کراوە بۆ ئەو کۆمپانیایانەی کە سیاسەتی "خۆت وا نیشان بدە تا کاتی خۆی دێت" (Fake-it-till-you-make-it) بەکاردەهێنن لە بواری ژیریی دەستکرددا؛ بە جۆرێک ئەو بەرهەمانەی وەک AI بازاڕکردنیان بۆ دەکرا، لە ڕاستیدا لەلایەن هێزی مرۆیی میکانیکاڵ تێرکەوە جێبەجێ دەکران. ئەمەش ڕێک لەگەڵ ناوی خزمەتگوزارییەکەدا دەگونجێت، چونکە "میکانیکاڵ تێرک"ـی ڕەسەن خۆی لە بنەڕەتدا فێڵێک بوو، کە تێیدا یاریزانێکی مرۆیی لە ناوەوە شاردرابووەوە و وای نیشان دەدا کە ئامێرێکی شەترەنجە.
بە تێپەڕبوونی کات، پەیوەندی نێوان میکانیکاڵ تێرک و مۆدێلەکانی ژیریی دەستکرد ئاڵۆزتر بوو. لە پێشهاتێکی تەنزئامێزدا (وەک مارێک کە کلکی خۆی بخوات)، شیکارییەکی ساڵی ٢٠٢٣ دەریخست کە لە نێوان ٣٣٪ بۆ ٤٦٪ی کارمەندانی پلاتفۆرمەکە مۆدێلە گەورەکانی زمان (LLMs) بەکاردەهێنن بۆ ڕاپەڕاندنی کارەکانیان، ئەمەش گومانی خستە سەر متمانەپێکراوی ئەو داتایانەی لە پلاتفۆرمەکەدا نیشانە دەکرێن و هەروەها پرسیاری ئەوەشی دروستکرد کە ئایا لە بنەڕەتدا پێویست بە بوونی مرۆڤ دەکات لەم پڕۆسەیەدا یان نا.
دوای ئاشکرابوونی هەواڵەکە، بەکارهێنەرێکی ڕێدێت ڕایگەیاند کە Mturk ساڵانێکە بەهۆی ساختەکاری و بۆتەکانەوە لەناوچووە و متمانەی لای کارمەندان و توێژەران نەماوە. بە بڕوای ئەو، هێشتنەوەی سێرڤەرەکانی ئەم پلاتفۆرمە لە لایەن ئامازۆنەوە تەنها بەفیڕۆدانی سەرمایەیە و لە کۆتاییدا بە تەواوی دایدەخەن.
