پوتین یاسایەک واژوو کرد بۆ پەرەپێدانی ئەپی پەیامنێری حکومی بۆ ڕکابەری لەگەڵ “واتساپ” و “تێلیگرام”
سەرۆکی ڕووسیا ڤلادیمیر پوتین، ڕۆژی سێشەممە، یاسایەک واژوو کرد کە ڕیگە دەدات بۆ پەرەپێدانی ئەپی پەیامنێری پشتگیری لە دەوڵەت کرابێت و یەکگرتوو بێت لەگەڵ خزمەتگوزارییە حکومییەکان، لە چوارچێوەی هەوڵی مۆسکۆ بۆ کەمکردنەوەی پشتبەستن بە ئەپەکانی وەک “واتساپ” و “تێلیگرام”.
ماوەیەکی درێژە ڕووسیا هەوڵ دەدات ئەوە بەرقەرار بکات کە پێی دەڵێت دەسەڵاتی دیجیتاڵی لە ڕێگەی بەهێزکردنی خزمەتگوزارییە ناوخۆییەکانەوە.
هەوڵی مۆسکۆ بۆ جێگۆڕکردنی پلاتفۆرمەکانی تەکنەلۆژیای بیانی زیاتر بووەتە پەلە لەگەڵ کشانەوەی هەندێک کۆمپانیای ڕۆژاوایی لە بازاڕی ڕووسی دوای هێرشی مۆسکۆ بۆ سەر ئوکرانیا لە فێبروری ٢٠٢٢، بەپێی ڕۆیتەرز.
یاسادانەرانی ڕووس دەڵێن ئەپی حکومی کارایی لەخۆ دەگرێت کە لە ئەپەکانی وەک “تێلیگرام” و “واتساپ” -کە هی کۆمپانیای میتایە- بەردەست نین، لەکاتێکدا ڕەخنەگران دەڵێن کۆنترۆڵی ڕووسیا بەسەر ئەپەکەدا مەترسی لەسەر تایبەتمەندی و ئازادییە کەسییەکان دروست دەکات.
میخائیل کلیماریڤ، بەڕێوەبەری کۆمەڵەی پاراستنی ئینتەرنێت (Internet Protection Society)، کە ڕێکخراوێکی ڕووسییە کە بە مافە دیجیتاڵییەکان سەرقاڵە، لە سەرەتای ئەم مانگەدا گوتی چاوەڕوان دەکات ڕووسیا خێرایی “واتساپ” و “تێلیگرام” کەم بکاتەوە بۆ هاندانی هاوڵاتیان بۆ گواستنەوە بۆ ئەپی نوێ.
