بەرزبوونەوەی نرخی زێڕ و زیو لەگەڵ دابەزینی بەهای دۆلار
نرخی زێڕ و زیو لە بازاڕەکانی جیهاندا بەردەوامن لە بەرزبوونەوە، ئەمەش دوای ئەوەی بەهای دۆلار بۆ نزمترین ئاستی خۆی لە دوای ٤ی شوباتەوە دابەزی. نرخی هەر ئۆنسەیەک زێڕ گەیشتە سەروو ٥٠٢٩ دۆلار، هاوکات نرخی زیویش بە ڕێژەی ٢.٥٪ ڕووی لە هەڵکشان کرد، ئەمەش وایکرد کڕینی ئەم کانزا گرانبەهایانە بۆ وەبەرهێنەرانی بیانی هەرزانتر و سەرنجڕاکێشتر بێت.
هۆکاری ئەم گۆڕانکارییانە بۆ چاوەڕوانیی وەبەرهێنەران دەگەڕێتەوە بۆ ڕاپۆرتی هەلیکاری ئەمریکا و ئەگەری کەمکردنەوەی ڕێژەی قازانج لەلایەن بانکی ناوەندییەوە لە ساڵی ٢٠٢٦دا. هەروەها گۆڕانکارییە سیاسییەکانی ژاپۆن و گفتوگۆ ناڕاستەوخۆکانی نێوان ئەمریکا و ئێران کاریگەرییان لەسەر سەقامگیریی بازاڕەکان هەبووە.
