ئەپلیکەیشنی “دوولینگۆ” ناتوانێت زمانی بیانی فێری بەکارهێنەران بکات

یارییەک بە بەرگی فێرکارییەوە

ئەپلیکەیشنی “دوولینگۆ” خۆی وەک “باشترین رێگا لە جیهاندا بۆ فێربوونی زمان” پیشان دەدات و دەیان ملیۆن بەکارهێنەر لە سەرتاسەری جیهان بە سیستەمی فێرکارییەکەی ڕاکێشاوە کە گوایە لەسەر بنەمای زانستی دامەزراوە.

بەڵام لە پشت ڕووکاری سەرنجڕاکێش و دیزاینە کارلێکەرەکەیەوە، پرسیاری جیددی سەرهەڵدەدەن: ئایا “دوولینگۆ” بەڕاستی فێرکارییە؟ یان تەنها یارییەکی ئەلیکترۆنییە کە فێربوون بە چەشنێکی خۆشیی ڕووکەشیی داپۆشیوە؟

ئەم ئەپلیکەیشنە، کە پشت بە دووبارەکردنەوە و دابەشکردنی لێهاتووییەکانی زمان بۆ وانەی کورتی ڕۆژانە دەبەستێت، زۆربەی کات لە پێشکەشکردنی ئەزموونێکی فێرکاری کارا شکست دەهێنێت، بەتایبەتی کاتێک بەراورد دەکرێت لەگەڵ ئامرازی جیددیتر وەک پۆدکاستەکانی زمان یان کتێبە نەریتییەکان، بەپێی ڕاپۆرتێک کە لە ماڵپەڕی “spectator” بڵاوکراوەتەوە.

لەجیاتی پەرەپێدانی لێهاتوویی قسەکردن یان تێگەیشتنی قووڵ لە ڕێساکان، “دوولینگۆ” تەنها بەکارهێنەران ڕادەهێنێت لەسەر ناسینەوەی وشە و ڕستەی سەیر کە زۆربەی کات لە ژیانی ڕاستەقینەدا بەکار نایەن، وەک: “ڕەبی دورگ دەخوات”.

لەناو ئەم دۆخەدا، کەسایەتی “دوو” کوندەی سەوز - هێمای ئەپلیکەیشنەکە - دەردەکەوێت، کە ماوەیەکی کەمە بووەتە بابەتی هەڵمەتێکی بازاڕگەرییی جێی مشتومڕ دوای “مردنی” لە ڕووداوێکی خەیاڵیدا بە ئۆتۆمبێلی “سایبەر ترەک”، کە تێیدا ئەپلیکەیشنەکە داوا لە بەکارهێنەران دەکات ٥٠ ملیار خاڵ کۆبکەنەوە بۆ گەڕاندنەوەی بۆ ژیان. هەنگاوێک کە وەسف کراوە بە هیچ پەیوەندییەکی بە فێربوونی زمانەوە نییە، بەڵکو بەکارهێنانی هەستەکانە بۆ زیادکردنی کارلێک و بەدەستهێنانی قازانج.

ئەزموونە کەسییەکان سنووردارێتی ئەپلیکەیشنەکەش پیشان دەدەن. یەکێک لە بەکارهێنەران، سەرەڕای بەکارهێنانی ڕۆژانەی ئەپلیکەیشنەکە بۆ ماوەی پێنج ساڵ، نەیتوانیوە وشەی “سوپاس” بە زمانی ژاپۆنی بنووسێت. کەسێکی دیکە، “دوولینگۆ”ی بۆ ماوەی ٣٠٠ ڕۆژ بەکارهێناوە، بەڵام نەیتوانیوە بە ئەڵمانی لەگەڵ خزمەکانی قسە بکات.

گاڵتەجاڕییەکە ئەوەیە کە “دوولینگۆ” خۆی وەک بەدیلێکی هاوچەرخ بۆ فێربوونی زمان پێشکەش دەکات، بەڵام لە ناوەڕۆکدا توخمە گرنگەکانی فێرکاری لە پشت ڕووکارێکی ڕەنگاوڕەنگ و تەکنیکەکانی “یاریزەکردن” دەشارێتەوە.

مەسەلەکە تەنها لە ئەپلیکەیشنەکە ناوەستێت، بەڵکو درێژ دەبێتەوە بۆ تاقیکردنەوەی زمانی ئینگلیزیش کە پێشکەشی دەکات، کە سەرەڕای قبووڵکردنی لەلایەن هەندێک زانکۆوە، هەمان کێشە پیشان دەدات وەک جەختکردنەوە لەسەر وشەی هەڕەمەکی و لاوازی لە هەڵسەنگاندنی لێهاتووییە تەواوکارییەکان.

لە کۆتاییدا، “دوولینگۆ” قەیرانی فێرکاریی دیجیتاڵی هاوچەرخ کورت دەکاتەوە - گرنگیدان بە ڕووکار لەسەر حیسابی ناوەڕۆک، و خۆشی لەسەر حیسابی تێگەیشتن.