ئایفۆن ١٨ پڕۆ ماکس بەهۆی کامێرا نوێیەکەیەوە کەمێک ئەستوورتر دەبێت

چاوەڕوان دەکرێت مۆبایلی داهاتووی ئەپڵ کە ناوی iPhone 18 Pro Max ـە، لە چاو مۆبایلی iPhone 17 Pro Max کەمێک ئەستوورتر بێت. هۆکاری ئەمەش بۆ ئەوە دەگەڕێتەوە کە ئەو بەشەی کامێراکانی لەسەرە (سەکۆی کامێرا)، قووڵتر و بەرزتر دروست دەکرێت. ڤادیر یۆریێڤ کە خاوەنی کەناڵی ناسراوی Max Tech ـە لە یوتیوب، چەند زانیارییەکی نوێی بڵاوکردووەتەوە. ئەم زانیارییانە لەسەر بنەمای مۆدێلە تاقیکارییەکانی iPhone 18 Pro Max وەرگیراون. هەروەها یۆریێڤ لە بەشێکی تری ڤیدیۆکەیدا، مۆدێلێکی تاقیکاری iPhone Ultra لەگەڵ iPhone 17 Pro Max بەراورد دەکات بۆ ئەوەی جیاوازییەکانیان دەربکەوێت.
سیستەمی کامێرای iPhone 18 Pro باشتر و پێشکەوتووتر دەکرێت
بەپێی قسەکانی یۆریێڤ، هەم ئەو سەکۆیە (پلاتفۆرمە) کەمێراکانی لەسەرە و هەم خودی هاوێنەکانی کامێراکە لە مۆبایلی iPhone 18 Pro Max زیاتر دەردەچن و بەرزتر دەبن ئەگەر بەراوردی بکەین بە مۆبایلی iPhone 17 Pro Max.
ئەمانە ژمارەی وردی ئەستووری مۆبایلەکانن:

• ئەستووری iPhone 17 Pro Max لە شوێنی کامێراکان: ١٢.٩٢ ملم
• ئەستووری iPhone 18 Pro Max لە شوێنی کامێراکان: ١٣.٧٧ ملم
• ئەستووری iPhone 17 Pro Max لە شوێنی سەکۆی کامێرا: ١١.٢٣ ملم
• ئەستووری iPhone 18 Pro Max لە شوێنی سەکۆی کامێرا: ١١.٥٤ ملم

کۆمپانیای ئەپڵ بە شێوەیەکی فەرمی دەڵێت ئەستووری هەردوو مۆبایلی iPhone 17 Pro و iPhone 17 Pro Max تەنها ٨.٧٥ ملمە، بەڵام ئەم پێوانەیە تەنها بۆ جەستەی مۆبایلەکەیە و بەزی کامێراکانی لەگەڵ هەژمار نەکراوە. بە هەمان پێوەر، مۆدێلی iPhone Air تەنکترینە و ئەستوورییەکەی تەنها ٥.٦٤ ملم دەبێت.
پێشبینی دەکرێت ئەم زیادبوونە لە ئەستووری مۆبایلەکەدا تەنها یەک هۆکاری هەبێت، ئەویش دانانی سیستەمێکی کامێرای زۆر پێشکەوتوو و بەهێزە کە بڕیارە پایزی ئەمساڵ لە زنجیرەی iPhone 18 Pro بخرێتە ڕوو.