کۆمپانیای شیاومی Xiaomi 17 Max بڵاودەکاتەوە

کۆمپانیای شیاومی دواجار ئەمڕۆ مۆبایلی Xiaomi 17 Maxی ڕاگەیاند کە زۆرترین چاوەڕوانی دەکرا، لەگەڵیدا گرنگترین تایبەتمەندییەکانی وەک شاشە تەختە گەورەکەی و تەمەنی درێژی پاترییەکەی خستە ڕوو، کۆمپانیاکە پشتڕاستی کردەوە کە مۆبایلەکە لەم مانگەدا دەخرێتە بازاڕەوە، هەرچەندە تا ئێستا بەروارەکەی دیار نییە.

زلهێزە تەکنەلۆژییە چینییەکە ئەمڕۆ یەکەم تێزەری مۆبایلی Xiaomi 17 Maxی بڵاوکردەوە و دیزاین و گرنگترین تایبەتمەندییەکانی ڕاگەیاند، سەبارەت بە شێوەی دەرەوەی، ئامێرە نوێیەکە لەسەر هەمان ستایلی زنجیرەی Xiaomi 15 بەردەوامە و خاوەنی چوارچێوەیەکی چوارگۆشەیە بۆ کامێراکانی پشتەوەی.

ئەم مۆبایلە بە سێ ڕەنگی سەرەکی بەردەست دەبێت: شین، سپی، و ڕەش. شیاومی جۆرە ڕووپۆشێکی تایبەتی لە "کاربۆن فایبەر" بەکارهێناوە کە وای لێدەکات هەم سەرنجڕاکێش بێت و هەمیش بەهێز و خۆڕاگر، ئەم جۆرە ڕووپۆشە تەنها بۆ مۆدێلە دیاریکراوەکانە، لە کاتێکدا مۆدێلەکانی تر خاوەنی پانێڵێکی پشتەوەی سیرامیکین.

جگە لە دیزاین، شیاومی جەختی لەسەر لایەنە سەرەکییەکانی وەک کامێرا و پاتری کردووەتەوە و بەڵێنی ئەزموونێکی بەکارهێنانی تەواو کارا و چوست دەدات.

بەپێی تێزەرەکە، Xiaomi 17 Max خاوەنی شاشەیەکی تەختی ٦.٩ ئینجییە؛ بەڵام جیاوازیی ئەم مۆدێلە لەگەڵ ئەندامەکانی تری زنجیرەی Xiaomi 17 تەنها لە گەورەیی قەبارەکەیدا نییە، بەڵکو لە ڕووی کوالێتی شاشە، توانای پاتری و کارایی کامێراشەوە گۆڕانکاری بنەڕەتی تێدا کراوە.

تایبەتمەندییە پێشبینیکراوەکان:

پاتری: 8000mAh لەگەڵ شەحنی وایەری 100W و بێوایەری 50W.
کامێرای سەرەکی: 200MP.
کامێرای دووەم: 50MP (گۆشە فراوان).
کامێرای سێیەم: 50MP (پێریسکۆپ تێلفۆتۆ) بە زوومی ئۆپتیکاڵی 3x.