ماڵئاوا لە ئینستاگرام و تیکتۆک؛ بەریتانیا یاسایەکی توند بۆ پاراستنی منداڵان لە سۆشیاڵ میدیا دەردەکات.

حکوومەتی بەریتانیا لە پلانیدایە بڕیارێکی توند و مێژوویی دژی بەکارهێنانی سۆشیاڵ میدیا لەلایەن منداڵانەوە دەربکات، بەپێی نوێترین ڕاپۆرتەکان، ئەگەری هەیە بەریتانیا بەکارهێنانی تۆڕە کۆمەڵایەتییەکان بۆ سەرجەم ئەو منداڵ و مێردمنداڵانەی تەمەنیان لە خوار ١٦ ساڵەوەیە بە تەواوی قەدەغە بکات.

ئەم هەنگاوە دوای ئەوە دێت کە نیگەرانییەکان لەسەر کاریگەرییە نەرێنییەکانی سۆشیاڵ میدیا لەسەر تەندروستی دەروونی، تەرکیز و سەلامەتی گەنجان گەیشتووەتە بەرزترین ئاست. بەرپرسانی بەریتانیا پێیان وایە کە یاساکانی پێشوو نەیانتوانیوە وەک پێویست پارێزگاری لە منداڵان بکەن لەبەردەم مەترسییەکانی جیهانی دیجیتاڵیدا.

ئەگەر ئەم یاسایە پەسەند بکرێت، کۆمپانیا زەبەلاحەکانی تەکنەلۆجیا (وەک مێتا، تیک تۆک، و ئێکس) ناچار دەکرێن سیستمی زۆر توندتر بۆ پشتڕاستکردنەوەی تەمەنی بەکارهێنەران پەیڕەو بکەن، بە پێچەوانەوە ڕووبەڕووی سزای دارایی خەیاڵی و قورس دەبنەوە.

ئەم بڕیارە چاوەڕوانکراوەی بەریتانیا، هاوشێوەی ئەو هەنگاوانەیە کە پێشتر چەند وڵاتێکی تری وەک ئوسترالیا گرتیانەبەر بۆ سنووردارکردنی دەسەڵاتی تۆڕە کۆمەڵایەتییەکان بەسەر نەوەی نوێدا.