ئایپاد مینی بە ڕوونمای OLED لە ڕێگادایە؛ چی چاوەڕوان دەکرێت؟
کۆمپانیای ئەپڵ سەرقاڵی ئامادەکردنی نەوەی داهاتووی ئایپاد مینییە (iPad mini 8)، کە پێشبینی دەکرێت گۆڕانکاری گرنگ لە ڕوونمای ئامێرەکە و ئاستی کارکردنیدا ڕووبدات.
پاش تێپەڕبوونی زیاتر لە ٢٠ مانگ بەسەر دەرچوونی ئایپاد مینی ٧، چاوەڕوانییەکان بۆ وەشانی نوێ بەم شێوەیەن:
ڕوونمایەکی نوێ و پێشکەوتوو
زانیارییە نوێیەکان ئاشکرای دەکەن کە ئەپڵ شاشەی ئایپاد مینی داهاتوو دەکاتە OLED ، ئەمەش وێڕای پێشکەشکردنی ڕەنگی زیندوو و ڕەشی قوڵ، قەبارەی ڕوونمایەکەش لە ٨.٣ ئینجەوە بۆ ٨.٧ ئینج زیاد دەکات.
ئاستی کارکردن (پڕۆسێسەر)
پێشبینی دەکرێت ئەم ئامێرە بە پڕۆسێسەری A19 Pro کار بکات. ئەم چیپە بە تەکنەلۆژیای ٣ نانۆمەتری دروستکراوە کە خێرایی و کارایی وزەی زیاتر دابین دەکات، هەروەها خاوەنی بزوێنەری زیرەکی دەستکرد (Neural Engine)ـی نوێیە بۆ باشترکردنی ئەرکە زیرەکەکان.
دیزاینی دژە ئاو
بەگوێرەی ڕاپۆرتەکانی "مارک گۆرمن"، ئەپڵ هەوڵ دەدات ئایپاد مینی نوێ بە شێوازێک دیزاین بکات کە بەرگەی ئاو بگرێت. بۆ ئەم مەبەستە، ئەپڵ کار لەسەر سیستەمێکی دەنگدانی نوێ دەکات کە پشت بە لەرزین دەبەستێت (Vibration-based speaker)، ئەمەش وادەکات چیتر پێویست بە کونیلەی بڵندگۆ نەکات و ئامێرەکە بە تەواوی داخراوبێت.
کاتی دەرچوون و نرخ
کاتی دەرچوون: پێشبینی دەکرێت لە نیوەی دووەمی ساڵی ٢٠٢٦دا ڕابگەیەنرێت.
نرخ: بەهۆی بەرزبوونەوەی تێچووی کەرەستە و چیپەکانی زیرەکی دەستکرد، پێشبینی دەکرێت نرخەکەی بەراورد بە نەوەی پێشوو بە بڕی ١٠٠ بۆ ٢٠٠ دۆلار بەرزتر بێت.
کۆمپانیای ئەپڵ تا ئێستا بە شێوەیەکی فەرمی ئەم دەنگۆیانەی پشتڕاست نەکردووەتەوە؛ لەگەڵ ئەوەشدا، چاودێرانی تەکنەلۆژیا پێیان وایە ئەم وەشەنە نوێیە گەورەترین پێشکەوتن دەبێت کە ئایپاد مینی لە ساڵانی ڕابردوودا بەخۆیەوە بینیبێتی.
