بازاڕی گەرمی AI نرخی ئایفۆن ١٨ پڕۆ بە ڕێژەی ٢٥٪ بەرز دەکاتەوە!
کۆمپانیای ئەپڵ بۆ بەرهەمهێنانی ئایفۆن ١٨ پڕۆی داهاتوو ڕووبەڕووی بەرزبوونەوەی تێچوو دەبێتەوە، ئەمەش ڕەنگە نرخی سەرەتایی ئامێرەکە بگەیەنێتە ١,٣٩٩ دۆلار؛ واتە زیادبوونێک بە بڕی ٢٠٠ بۆ ٣٠٠ دۆلار بە بەراورد بە ئایفۆن ١٧ پڕۆ. ئەم زیادبوونی نرخە بە پلەی یەکەم بەهۆی کەمیی جیهانیی چیپەکانی بیرگەی DRAM و NAND فلاشەوەیە، چونکە کۆمپانیاکانی بەرهەمهێنەری چیپ، بەرهەمهێنانی خۆیان گۆڕیوە بۆ دابینکردنی پێداویستییە بەرزەکانی سەنتەرەکانی داتای ژیریی دەستکرد (AI).
شیکارییەکانی کۆمپانیای TechInsights نیشانی دەدەن کە تێچووی پارچەکانی بیرگە بۆ ئەپڵ ڕەنگە چوار هێندە ببێت، ئەمەش تێچووی گشتیی کەرەستەکانی ئایفۆن ١٨ پڕۆ بە ڕێژەی ٢٥٪ زیاد دەکات و دەیگەیەنێتە نزیکەی ٧٢٦ دۆلار. سەرەڕای ئەوەش، چاوەڕوان دەکرێت سیستەمێکی نوێی کامێرا کە تێچووی زیاترە، نرخەکە هێندەی تر بەرز بکاتەوە. لەبەر ئەوە، پێشبینی دەکرێت ئایفۆن ١٨ پڕۆ ماکس ١٠٠ دۆلار گرانتر بێت لە مۆدێلی پڕۆ، لە کاتێکدا دەنگۆی ئەوە هەیە ئایفۆنێکی نوێی چەماوە بە ناوی "ئایفۆن ئۆڵترا" بە نرخی نزیکەی ٢,٠٠٠ دۆلار ڕابگەیەندرێت.
