ڕۆبێرت و ماتیلدا؛ یەکەمین هاوسەرگیریی ڕۆبۆتەکان لە مۆسکۆ
لە مەراسیمێکی ناوازەدا لە مۆسکۆ، دوو ڕۆبۆتی مرۆڤنما بە ناوەکانی ڕۆبێرت و ماتیلدا بەشدارییان لە یەکەمین ئاهەنگی هاوسەرگیریی تایبەت بە ڕۆبۆتەکان لەسەر ئاستی ڕووسیا کرد.
ئەمە تەنها هاوسەرگیرییەکی هێمایی بوو نەک یاسایی؛ ئامانجی سەرەکی لێی، نمایشکردنی ئاستی پێشکەوتنی ڕووسیا بوو لە دروستکردنی ڕۆبۆتدا و دۆزینەوەی وەڵام بۆ ئەوەی چۆن ڕۆبۆتەکان لە داهاتوودا تێکەڵ بە ژیانی مرۆڤ دەبن.
بۆ ئەوەی مەراسیمەکە هاوشێوەی هاوسەرگیرییەکی ئاسایی دەربکەوێت، هەموو شتێک ڕێکخرابوو: ئاڵوگۆڕکردنی ئەڵقە، خوێندنەوەی سوێندی هاوسەرگیری، ژەنینی مۆسیقا، سەمای دووقۆڵی و کۆبوونەوەی میوانان. ئەمەش وای کرد دیمەنەکە بە تەواوی ڕەسەن و نەریتی بێت.
بەپێی وتەی ڕێکخەران، ئامانجی سەرەکیی ئەم بۆنەیە نمایشکردنی لێهاتوویی ڕۆبۆتە مرۆڤنماکان بوو لە ئەنجامدانی جووڵەی سروشتی، پەیوەندیکردن و تێکەڵبوون بە چالاکییە کۆمەڵایەتییەکانەوە.
ئێستا ڕۆبۆتی مرۆڤنما تەنها لە فیلمەکاندا نییە، بەڵکو لە بوارەکانی تەندروستی، پیشەسازی، پەروەردە و خزمەتگوزاریی کڕیاراندا پەرەیان پێدەدرێت. چالاکییەکی لەم شێوەیەش نیشانی دەدات کە تەکنەلۆژیای ڕۆبۆت بە چ خێراییەکی سەرنجڕاکێش پێش دەکەوێت و چۆن لە داهاتوودا دەبنە بەشێکی سوودبەخش لە ژیانی ڕۆژانەی هەمواندا.
